༄༅། །སྐྱབས་རྗེ་ཡིད་བཞིན་ནོར་བུ་བྱ་བྲལ་
སངས་རྒྱས་རྡོ་རྗེ་རིན་པོ་ཆེའི་
ཞལ་གདམས་བཞུགས།
༄༅། །ན་མོ་གུ་རུ་བྷྱ།
རྗེ་བཀའ་དྲིན་འཁོར་མེད་ལས་འབྲེལ་རྩལ།།
མི་བདག་གི་སྤྱི་བོའི་རྒྱན་དུ་བཞུགས།།
གནས་འཁོར་བ་ངན་སོང་སྡུག་བསྔལ་ལས།།
དུས་ད་ལྟ་ཐར་བར་བྱིན་གྱིས་རློབས།།
ཚུར་ཉོན་དང་འདིར་འདུས་བུ་སློབ་ཚོ།།
སྙིང་མ་རུལ་མནོ་བསམ་སེམས་ལ་ཐོངས་།།
མིའི་ལུས་རྟེན་བརྒྱ་ལ་ལན་གཅིག་འདི།།
ཐོབ་ཟིན་ཀྱང་ལྷ་ཆོས་མ་འགྲུབ་ན།།
ཕྱིས་འདི་འདྲ་རྙེད་པར་ག་ལ་འགྱུར།།
དོན་དེ་ཕྱིར་སྙིང་པོ་ལེན་པར་གཅེས།།
ལུས་གཡོག་དང་གྲུ་ཡི་འདུ་ཤེས་ཀྱིས།།
ཡུད་ཙམ་ཡང་དལ་བར་ཉལ་མ་འཇུག།
སྒོ་གསུམ་པོ་དགེ་བསྐུལ་བེད་ཆོད་མཛོད།།
ལྟོ་གོས་ཙམ་ཕྱིར་དུ་ཚེ་གང་པོ།།
སྡིག་སྡུག་བསྔལ་ཁྱད་བསད་འབད་གྱུར་ཀྱང་།།
འཆི་ཙམ་ན་འཁྱེར་དབང་མེད་ཚུལ་སོམས།།
རང་འཚོ་གོས་བསོད་སྙོམས་བྱས་ཀྱང་ཕྱིད།།
ཟས་ཤ་ཆང་ཞིམ་དགུ་མང་ཟོས་ཀྱང་།།
སང་ནངས་པར་མི་གཙང་རྫས་སུ་འགྱུར།།
དོན་དེ་ལས་སྙིང་པོ་མི་འདུག་པས།།
ལུས་འཚོ་ཆས་ངན་ངོན་ཆོག་ཤེས་བྱ།།
གྱོང་ལྟོ་གོས་གཏམ་ལ་བསྐུར་བ་དགོས།།
ཚེ་མི་རྟག་འཆི་བ་མ་དྲན་ན།།
ཆོས་རྣམ་དག་འགྲུབ་རྒྱུ་མེད་པའི་ཁར།།
གྲབ་ཡིད་སྨོན་ཕྱི་ཤོལ་ངང་དུ་ལུས།།
དགྲ་འཆི་བདག་སླེབ་ཉིན་འགྱོད་ཀྱང་ཕྱིས།།
སྤྱི་འགྲོ་དྲུག་གནས་ན་བདེ་བ་མེད།།
སྒོས་ངན་སོང་གསུམ་གྱི་སྡུག་བསྔལ་ནི།།
ཚིག་རྣ་བས་ཐོས་ཀྱང་ཡི་མུག་ན།།
རང་ཐོག་ཏུ་བབ་ན་ཇི་ལྟར་བཟོད།།
ཡར་མཐོ་རིས་གསུམ་གྱི་བདེ་སྐྱིད་ཀྱང་།།
དུག་བཏབ་པའི་ཁ་ཟས་བཟང་པོ་བཞིན།།
འཕྲལ་བདེ་སྟེ་ནམ་ཕུག་ཕུང་བའི་རྒྱུ།།
ལར་བདེ་སྡུག་སེམས་ཀྱིས་མྱོང་བ་ལ།།
ཁོང་བྱེད་པོ་གཞན་ཞིག་ཡོད་མིན་ཏེ།།
ལས་དཀར་ནག་གཉིས་ཀྱིས་བྱས་པ་ཡིན།།
དེ་ཤེས་ནས་རྩ་བ་སྤང་བླང་ལ།།
དོན་ལག་ལེན་འཛོལ་མེད་གནད་དུ་ཆེ།།
ཆོས་ཞུ་ལོ་ཐོས་ལོ་མང་པོ་ལས།།
ཕ་མཚན་ལྡན་བླ་མའི་མན་ངག་ལ།།
བློ་ཐེ་ཚོམ་སྒྲོ་འདོགས་བཅད་པ་དགའ།།
ལུས་དབེན་པར་གནས་པའི་དོན་སྒོ་ལ།།
དགྲ་འདུལ་དང་གཉེན་སྐྱོང་ཆགས་སྡང་དང།།
ཚོང་བོན་བསྐྱེད་འདུ་འཛི་མ་སྤོང་ན།།
ཐབས་དེ་ལས་སྡུག་པ་ཡོད་མ་ཡིན། །
སེམས་ཆོག་ཤེས་འབྱོར་པ་དེ་མེད་ན།།
ཕྱིའི་ཀ་ཆ་མི་དགོས་དགུ་དགོས་པ།།
མི་སྐྱེ་བོ་ཕལ་པ་ལས་ཀྱང་ཐུ།།
ཆོས་ཉམས་ལེན་ཐུན་གཅིག་མི་འགྲུབ་ཕིར།།
ད་ཅིས་ཀྱང་དགོས་མེད་ལ་བློ་གཏད་བཅོལ།།
ནོར་ཁེ་དྲག་དགྲ་འདྲེའི་གཡབ་མོ་ཡིན།།
སྐྱིད་འདོད་ཀྱི་ཆོས་པ་ཚེ་འདི་ལ།།
བློ་མ་ལོག་པས་ཡང་དག་ཆོས་སྐལ་ཆད།།
ཆོས་དྲེད་པོར་འཆོར་བས་གཟབ་འཚལ་ལོ།།
དོན་བྱ་བ་ཉུང་ལ་བརྩོན་འགྲུས་ཆེ།།
སེམས་ཙབ་ཙུབ་མང་པོར་མི་སྡང་བར།།
སྤྱིལ་པོ་ཡི་མལ་སར་ལྷོད་ཆགས་པ།།
དེ་འདྲ་ལ་ཆོས་པའི་གཡང་འཁོར་ངེས།།
ལོ་ཟླ་བ་མང་པོར་མཚམས་བསྡམས་ཀྱང་།།
རྒྱུད་སྔར་ལས་ཡར་བསྐྱེད་མ་བྱུང་ཕྱིན།།
ཡུན་རིན་པོའི་བྱས་ཡུས་འདྲེན་པ་དེ།།
སྡུག་སྒུར་དང་མུག་སྒུར་མ་སོང་ངམ།།
གཏམ་སྙན་གྲགས་ལ་བརྟེན་ནས་ང་རྒྱལ་སྐྱེ།།
དགྲས་ལོག་སྒྲུབ་བཟོད་པ་དཀའ་ཐུབ་མཆོག།
ཚིག་འཇམ་རྩུབ་ཙམ་ལ་སྡང་ཞེན་ལངས།།
གྲོགས་གཞན་གྱི་སྐྱོན་མཚང་ནན་གྱིས་བརྟག།
རང་རྒྱུད་ལ་བྱ་ར་མི་བྱེད་པར།
དུས་རྟག་པར་སྤུ་སུད་ཚ་པོ་དེས།།
རོགས་རྣམས་ལ་དམ་ཉམས་གསོག་ངེས་པས།།
དྲན་ཤེས་བཞིན་དང་བག་ཡོད་རྟག་བསྟེན་མཛོད།།
འདུ་འཛི་དང་དབེན་པ་གར་གནས་ཀྱང་།།
འདུལ་དགོས་རྒྱུ་ཉོན་མོངས་དུག་ལྔ་དང་།།
དགྲ་ཆོས་བརྒྱད་མ་གཏོགས་གཞན་མེད་ཕྱིར།།
ལམ་སྤོང་བསྒྱུར་ལམ་བྱེད་ངོ་ལྟ་བཞི།།
རང་རྒྱུད་ཚོད་བསྟུན་ལ་གང་མོས་བྱ།།
སེམས་ཐུལ་བ་ལས་ལྷག་པའི་གྲུབ་རྟགས་མེད།།
ལག་མཚོན་མེད་དཔའ་བོ་གཡུལ་རྒྱལ་ཡིན།།
ཆོས་མདོ་སྔགས་གཉིས་པོ་ཉམས་ལེན་ཚེ།།
གནད་གཞན་ཕན་བྱང་སེམས་སྨོན་འཇུག་སེམས།།
འདི་ཐེག་ཆེན་རྩ་བ་ཡིན་པའི་ཕྱིར།།
ཡོད་དེས་ཆོག་མེད་ན་ཐབས་ཆག་ལགས།།
ཚིག་འདི་སྐད་སྦས་པ་པདྨའི་ཚལ།།
དེའི་་ཡང་ཁྲོད་བྱེ་བྲག་ནགས་ཀྱི་མཐོངས།།
མཚན་ཀུན་བཟང་ཆོས་གླིང་འབོད་པ་དེར།།
སྤྲང་གཅོས་རྒན་སངས་རྒྱས་རྡོ་རྗེས་གདམས།།
དགེའོ།། །།
