༧སྐྱབས་རྗེ་བྱ་བྲལ་སངས་རྒྱས་རྡོ་རྗེས་གསུངས།
དཔལ་ཡང་ལེ་ཤོད་རིག་འཛིན་གྲུབ་པའི་དགའ་ཚལ་གྱི་སྒྲུབ་སྡེའི་བཅའ་ཡིག་སྡོམ་གསུམ་མཛེས་རྒྱན་ལས།
ཤ་ཟ་བ་ལ་ཐེག་ཆེན་ཕ་རོལ་ཏུ་ཕྱིན་པ་དང་། གསང་བསྔགས་ལས་དེ་ཙམ་དགག་བྱ་མི་ཆེ་ཞེ་ན། དེ་ནི་ཐོས་པའི་ཤེས་རབ་ཀྱི་མིག་དང་བྲལ་བའི་སྐྱོན་དུ་ངེས་ཏེ། འདི་ལྟར་ལུང་ལས། གང་ཞིག་ཤ་ཁྲག་ལོངས་སྤྱོད་ནི། །ཁམསགསུམ་ཕུང་བར་བྱེད་པའི་ཟས། །ཐར་པའི་སྲོག་རྩ་གཅོད་པའི་མཚོན། །བྱང་ཆུབ་ས་བོན་བསྲེག་པའི་མེ། །དལ་འབྱོར་མཐོ་རིས་འཇོམས་པའི་ཐོག །སུས་ཀྱང་ཟ་བར་མི་རུང་ན། །རྒྱལ་བའི་བསྟན་ལ་རབ་བཞུགས་པའི། །སྐྱབས་གསུམ་འཛིན་པའི་དགེ་བསྙེན་ནས། །དགེ་ཚུལ་དགེ་སློང་ཁྲུམས་ལྡན་པས། །བཟའ་བར་ནམ་ཡང་མ་གནང་ངོ་། །བྱང་ཆུབ་སེམས་དཔའི་ལམ་ཞུགས་པས། །ཕ་མར་གྱུར་པའི་སེམས་ཅན་ཤ །ཟོས་པའི་ཉེས་དམིགས་རྒྱ་ཆེར་འགྱུར། གསང་བ་བསྔགས་ཀྱི་ལམ་དུ་ཡང་། །ལྟ་དང་ཡེ་ཤེས་མི་ལྡན་པར། །ཤ་ལ་བཟའ་བར་མི་རུང་ངོ་། །ཞེས་པ་འདི་ཙམ་ཡང་མིག་ལམ་དུ་མ་གྱུར་པ་མ་ཡིན་ནམ། དེས་ན་སྔོན་བྱོན་དམ་པའི་སྐྱེས་ཆེན་ཚད་མར་གྱུར་པ་མང་པོས་ཀྱང་ཤ་ཁྲག་དུག་ཟས་བཞིན་སྤངས་བར་མཛད་པའི་རྣམས་ཐར་གཙང་མ་ལྷུར་བཞེས་པ་ཡིན་ཏེ། མ་ཅིག་ལབ་སྒྲོན་གྱིས། ངས་ནི་ཤ་བཟའ་བ་ལྟ་ཞོག །སེམས་ཅན་མིག་སྔོ་རིག་གེ་བ་དེ་མཐོང་བ་ཙམ་གྱིས་སྙིང་རྗེ་ཚད་མེད་པ་སྐྱེ་བ་འདུག་ཅེས་གསུངས། དེ་བཞིན་དུ་རིག་འཛིན་འཇིགས་མེད་གླིང་པས། ཤ་འདིའི་བདག་པོ་སྲོག་ཆགས་དེ་འཕགས་པ་ཀཱ་ཏྱཱ་ནས་བསོད་སྙོམས་ལ་གཤེགས་པའི་ལོ་རྒྱུས་ལྟར་སྐྱེ་བ་སྔ་མའི་ཕ་མ་ནི་ཡིན་ངེས། དེ་ཡིན་ན་ད་ལྟའི་ཕ་མ་ལ་ཤན་པས་སྲོག་ལས་བྱས་པའི་ཤ་བྱིན་ན་བཟའ་བར་འདོད་དམ། སྙིང་རེ་རྗེ་སྙམ་དུ་བསམ་མནོ་ཞིག་བཏང་ན། བློ་གཟུར་གནས་ཤིག་ཡིན་ཕྱིན་ཆད་སྙིང་རྩེ་ཤུམ་ཤུམ་པ་དང་། སེམས་ཅན་དེ་ལ་སྙིང་རྗེ་དབང་མེད་དུ་མི་སྐྱེ་བའི་ཐབས་མེད་ཅེས་དང། སྔགས་པར་ཁས་བླངས་ནས་ཤ་ཆང་བག་མེད་དུ་ཟ་བ་དག །ཁྲ་སྤྱང་ལས་ཁྱད་པར་ག་ལ་ཡོད། ཅེས་གསུངས། དེ་བཞིན་དུ་སྙིང་ཐིག་གི་བརྒྱུད་པ་གོང་མ་རིག་འཛིན་འཇིགས་མེད་གླིང་པའི་དངོས་སློབ། འཇིགས་མེད་རྒྱལ་བའི་མྱུ་གུ་དང་། དེའི་སློབ་མ་སེམས་དཔའ་ཆེན་པོ་འཇིགས་མེད་ཆོས་ཀྱི་དབང་པོ། འཇིགས་གླིང་སྐུ་ཕྲེང་གཉིས་པ་མཁྱེན་བརྩེ་ཡེ་ཤེས་རྡོ་རྗེའི་དངོས་སློབ། འོད་ལུས་གྲུབ་པ་པདྨ་བདུད་འདུལ། དེའི་ཡང་སློབ་བྱ་བཏང་ཚོགས་དྲུག་རང་གྲོལ་སོགས་དམ་པའི་སྐྱེས་ཆེན་དེ་རྣམས་ཀྱིས་ཤ་ཆང་དྲི་ཙམ་ཡང་མི་བསྟེན་པའི་དམ་བཅའ་བརྟན་པོ་དང་ནམ་ཡང་མི་འགལ་བ་མཛད་དེ་མདོ་བསྔགས་ཀྱི་བསྟན་པ་འཛིན་སྐྱོང་སྤེལ་ཏེ་དོན་གཉིས་ལྷུན་གྱིས་གྲུབ་པ་ཤ་སྟག་བྱུང་བ་ཡིན། དེ་ལྟ་བུའི་དགག་བྱ་དང་དགོས་པ་ཤིན་ཏུ་ཆེན་པོ་མཐོང་ནས་བདག་གིས་ཀྱང་སྔོན་གྱི་ཚེ་འཕགས་ཡུལ་དབུས་འགྱུར་མ་ག་དྷ་རྡོ་རྗེ་གདན་བྱང་ཆུབ་ཤིང་དབང་གི་དྲུང་དུ་ཕྱོགས་བཅུའི་རྒྱལ་བ་སྲས་དང་བཅས་པ་དཔང་དུ་གསོལ་ནས་ཤ་ཆང་སྤངས་བའི་དམ་བཅའ་ལྷུར་བླངས་ཤིང་རང་གི་དགོན་ཁག་རྣམས་སུའང་ཤ་ཆང་སྤོང་དགོས་པའི་ཁྲིམས་བཅས་པ་ཡིན་པས་སླད་ནས་བདག་གི་ངག་ལ་བརྩི་མཁན་བྱུང་ན་ཀུན་གྱིས་ཆོས་ཀྱི་ཁྲིམས་འདི་ལས་ནམ་ཡང་མ་འདའ་ཞིག་ཅེས་སྙིང་ནས་གསོལ་བ་ལགས།།
